Jetoj si një grua!

Jetoj brenda trupit si një grua.

Me sytë venitur pagjumë

Netëve të gjata nën grindje fëmijësh,

Nën zhurmat gërvishëse të makinës

që veç teshave lan gjurmët e trishta.

Jetoj imagjinatës si një grua.

Ngjitem qiejve të kristaltë të agimeve

Mbledh aromën e lëndinave,

Mbledh magjinë e çdo rreze drite,

I kompozoj buqetë.

Cicërimat e zogjve mbi pemë

futen brenda shpirtit tim.

Rrjeta e mëndafshtë hedhur supeve i shoqëron.

Aty ku jetoj imagjinatës.

Jetoj realitetin, si një grua.

Më duhet të krihem

Të vishem bukur e stolisem.

Sytë lakmitarë nuk flenë kurrë…

Buzëqesh përballë ngërdheshjeve,

Pas çdo maske arrij tē njoh fytyrën e vërtetë

edhe pse heshtja më vret…

Muzgut, Dielli më pyet: A jetove sot?

Po, si një grua.

Ndaj mos harro,

më përshëndet nesër!

Melaize Gropa